《西遊記：女兒國》香港電影預告

【香港變成女兒國，你作為唯一一個男人，生活會點過？】
　
有十個男人聽到「女兒國」三個字，九個都會立即流晒口水。
　
而我，係第十個，因為我諗起香港係女兒國，作為男人嘅我一定好慘…
　
男女思維截然不同，女人比較著重「時間性」思考。
舉個例子：
　
「你約會試過一次遲到」＞「你今次一定會遲到」＞「你永遠都係唔守時嘅人」
　
正因佢哋經常有呢種諗，即使拍拖十年來你只係遲過一次到，女朋友都會話：
　
「你次次都遲到，警告你聽日唔好再遲到啊！」
　
所以幻想一下，成個香港都係女人，你作為唯一一個男人，生活係點？
　
返工前接到老闆電話：「喂！你日日返工都遲到嘅，今日有客到，你唔好遲啊！」
　
幸好我準時返到公司，點知一返到去就收到個客電話：
　
「我要投訴你！」
「點解啊？」
「我尋晚發夢，你啲貨出錯晒！」
「阿姐，妳發夢啫…」
「你而家講野咩態度？！」
　
結果，女上司好認同個客所講嘅嘢，我真係收到warning letter…
　
終於到捱到食Lunch～我打開飯盒，舒一口氣。
同事走過嚟問我：「做乜今日咁靜嘅？唔舒服？定係有心事？」
「無嘢啊…」
　
為咗帶起話題，我就問大家：「係喎，大家尋晚有冇睇波？」
　
全場靜晒，繼續討論佢哋熱衷嘅韓劇…
當然啦，我更加唔敢講，我尋晚通宵屠龍。
因為喺只得女人嘅香港，打機係犯罪行為，就好似吸食大麻咁，某啲國家合法，香港係死罪。
　
終於都捱到放工，返到屋企一打開門…
　
就見到女朋友！佢煮定飯等我返屋企食！仲煲咗靚湯。
我摟住佢，錫咗佢一啖，佢問我返工辛唔辛苦，一陣食完飯幫我按摩。
　
見到女朋友，我一整日嘅怨氣一下子消失晒。
所以！我根本唔需要女兒國，我只需要女朋友就足夠！
　
順帶一提…
如果你覺得奇怪點解臨尾都要讚揚女朋友。
係因為我一定要咁做，否則佢會嬲我「乜你好想全香港都係女人咩吓？！」
　
想像力驚人，連幻想都要控制你。呢啲就係女人嘅可怕之處。
　
＝＝＝送戲飛＝＝＝
　
當然，以上只係誇張咗嘅科幻故事，如講中你嘅雷同，實屬不幸。
我會送返張《西遊記女兒國》戲飛畀你補返數。
只要留言講低如果香港變成女兒國，對你生活上最大影響會係咩？
留言者會抽出５位，得到電影戲飛２張！

---